الجوهر اين ؟؟!! في عصرنا هذا نرى بان المظهر الخارجي قد طغى على الجوهرة فكان السؤال الجوهر اين ؟؟

ولو لاحظنا لرأينا ان المظهر الخارجي اصبح هو المعيار الرئيسي في تحديد مكان الفرد منا كل في مجتمعه ونضرب في هذا المثال ثمرة ناكلها في الغذاء وهي الجحة الكبيرة يوحي منظرها بانها لذيذة الا ان لبها فاسد او لاطعم له وما نظارتها الا بمنظرها الخارجي

هذه الظاهرة والتي تعد وباء قد تفشت في المجتمع بشكل رهيب حتى انها وصلت لبيوت العبادة للمساجد بحيث نرى ان المصلي يصل الى الصلاة بوقت متأخر وهو يمشي وكانه الطاووس

ولو سالته في امر دينه لاجابك بما لايعقل ولايتقبله العقل

سنلقي بنظرة على بعض الوقفات وسنبدأها بـــ

الملابس الضيقّة الفاضحة والشعر المنسدل ربما نجد بعضها وربما اكثره او بالكامل والمكياج أبو 3.5 سنتيمتر والعطر الفواح الذي يفتن حتى الصراصير الهرمة والصوت الرقيق المنساب كانسياب قطرات الندى فوق أغصان الشجر.

فتاة عصرنا وما أدراك ما فتاة عصرنا, تلك الفتاة التي تربّت على قناة الروتانا, تلك الفتاة التي تربّت في بيت يقولون به (سوري) و (بليز) و (هاي), وربما بيت محتشم الا نها تغاضت عن الاحتشام وربت نفسها على غيره تلك الفتاة التي لو قلت لها اقرأي سورة الفلق قالت لك (معلش أنا عندي حقوقي وحريتي) ولا تعرف غير هذه الجملة.

الله الله على المظهر ورحمك الله أيها الجوهر.

من كل 10 فتيات تجد فتاة واحدة مرتبطة بقراءة القرآن الكريم و 9 فتيات مرتبطات بالجوال والنت وهالايام لبلاك بيري دور كبير واللي ما عندها وعيييييه تفشل .

فتاة اليوم هي فتاة ستار أكاديمي التي تنتظر فارس الأحلام ليقودها في حفلات جائزة الأوسكار, فتيات أحلام اليقظة, فتيات يحلّقن في الأوهام ولا يدرين أن شباب اليوم طفرانين.

هذه هي قصة فتيات المظهر, فتيات بلا توجيه بلا محتوى بلا فهم صحيح للحياة.

فتيات لا يوجد عندهن بُعد نظر وإن وُجد فهو يقتصر على لون الفستان – (مين أحلى الوردي أم الابيض ؟ ) وفي النهاية تختار الشفّاف .

ننتظر تعليقاتكم وبعده نسرد صورة اخرى وجاينكم الدور يالشباب مو بس البنات

كلماات جمييلة جداا

وهذا الي الحين في البنات جيلنا الحالي

الي يقول مايدرون شنو بيصير فيهم يوم القيامة

ويعني الحين قرب الظهور فلازم انحط بالنا عدل

ونمشي ورا عقيدتنا وائمتنا اهل البيت

مشكوور على الطرح

جعله الله في الميزان حسناتك

وبانتظار جديدك

تقبل مروري

~ْ تحيه ~ْ

للاسف لا يوجد من يسمع

و لو نصحتها قالت انتين وحدة رجعية و متخلفة و مدينة و متعقدة

و انتي تخربين على وناستي و ما تخليني اعيش حياتي

تبغين تقيديني و اني توني صغيرة

للحين ما عشت حياتي

و الحين بعد طالعين بطلعة

لين كبرت بصلي عدل !!

لين كبرت بقراة قران !!

لين كبرت بلبس عباية !!

و لين و لين !!!


و هي للاسف ما تدري ان الله يمكن ياخذ امانته قبل اللين الي تقول عنها

بس من اللي يسمع و يتعظ

و مثل ما قالت سماء قرب الظهورر و احنا للحين ما سوينا شيء


بس عجبتني هي تموت من الضحك

بس للاسف هي القاعدة اللي ماشية الحين

والله وللاسف هاي الواقع المر الي نعيشه ..

وهاي بنات الحين وين الموضه هم وراها وين الاشياء الي تلفت النظر وراها ..

ابد ما يعطون اهميه حق الشي الي يتسببون فيه الى روحهم من نظرة الناس ..

ومن ربهم الي يغض عليهم اذا جاف عبديه في هالوضع .. وللاسف الدين

ضايع عند هالنوعيه من البنات واذا جيت تنصح تقول اووه دي ويش فيها ..

معقده اووف لوعت جبدنا .. هاي الكلام الي راح يقولونه والله انتين متخلفه مالت اول ..

وصار الي يلتزم ويتمسك بدينه يصير متخلف .. والين لبست وحده عبايه الراس ويش قالوا ويييع

كانش عجوز .. كل شي اليه وقته يعني عن نفسي البالطو اليه اماكن معيه مثل السوق الشغل حديقه ..

هاي الاماكن الي تستدعي والي اني يعني شخصيا البس فيها .. لكن في الماتم الي اكثر مكان لازن تلتزم فيه

البنت بالعبايه نجوف البنات بالطو ومنقش كانه دفتر تلوين وحاطه مكياج وتجي الماتم .. وين قلوبكم تعزون الزهراء

بالهمنظر .. واذا تكلمت عطوك الاذوت الصمخه وقالوا متخلفين .. الاغاني مثل الشي اذا ما تسمع اغاني قالوا ويش

عادي ويش صار نسمع حق نغير نفسيتنه لانه اذا كنه متضايقين نسمع .. ليش اذا كنتين متضايقه ما تسمعين قران عزه مياليد ..

في اشياء واجد غير الاغاني ..

ولكن بعد في بنات محترمات والنعم فيهم واذا انطرى اسمها الواحد يشرق بريقه من زود ما هي على خلق ..


بسلموو خوك على الطرح المميز والرائع

دوم مفاجأنه بمواضيعك الرائعه والشيقه

دمت لنا اخي الكريم ودامت مواضيعك ...

الجميل هو ان اجد من يتفاعل وان يكون لهذا الموضوع فائدة

وان ارى كلمات ككلماتك تنير صفحتي

اتفق معك اختي واذا كنا نسعى للقاء صاحب العصر والزمان لابد وان تكن سريرتنا بيضاء نقية

ولو فرضنا بان العالم الفلاني سيزور البحرين وهذا العالم يقرأ وجه الانسان ويعرف سريرته اهو مؤمن او منافق

يعني هذا الشخص زين لو مو زين فبتروح تستقبله وبتشوف وجهه النوراني وهو من يشوف واحد ويطالع بوجهه راح يعرف ان هالانسان زين او شين فاللي مو واثق من نفسه ما بيروح يخاف يشوفه على حقيقته مثل ما زين العابدين شاف اللي يطوفون حول البيت على شكلهم الحقيقي

والسؤال :: هل تتمنى لقاء الامام المنتظر (ع) ؟ وانت تعلم بان الامام بيشوفك على حقيقتك ؟
واذا تعرف بيشوفك على حقيقتك فليش تنتظر وقت الظهور ؟ وليش ماتشتغل من اللحين ؟


تحياتي لك اختي على المساهمة النورانية

مروركم عطر صفحاتنا بشذاه العطر

هناك من لاسمع النصح والارشاد وهناك من لايعجبه طريقة النصح

البعض يستحيل ان يتقبل النصيحة مهما كانت وممن كانت

والبعض الاخر يتقبلها الا انه يريد طريقة معينة وخاصة

كلامك اختي دائما مايلامس الواقع الذي نعيشه

عجبي من هالناس اشلون جذي يتعاملون مع النصيحة ونسو ان الاخ مرآة اخيه

نعم اختي صدقتي والاعمار بيد الله ولانعلم متى نكون بقبورنا فلماذا التساهل والتاخير

راح يتذكرون ان فلان من الناس قدم نصيحته ورفسناها وسدينا مسامعنا عنه


تحياتي لك اختي ولامواجك الوردية

نعم مديرتنا جسدتي صورة من الواقع الذي نعيشه تماما

وكان الجيل الجديد يبي بس حرية ومحد يقول ليه لا لاتسوي جذي مثل الطفل يبي ياخذ حريته

وانت زين اذا ساكت واذا نصحت شوف ويش تحصل من اسم مزعج عجوز شايب رغاي ... الخ

واحنا بعد يمكن نرتكب اخطاء بطريقة نصحنا ولازم نتعلم طريقة يتقبلها الطرف الثاني


تحياتي لكم اختي والخضرة تحتاج ماء لنظارتها وانت الماء

الشباب




وصل دور الشباب يعني مو بس البنات



شباب اليوم هل هم شباب المقاهي شباب الشيشة والسجائر وهل الرجولة هي ان تكون من المدخنين او لاتكون رجل

هذه مفارقة عجيبة غريبة نشهدها في عصرنا الحالي بحيث انك تتعجب من مواقف جدا غريبة بحيث ترى ولد للتو في مرحلته الاعدادية او بمجرد دخوله الثانوية يتبختر بالسجائر وكانه يلمح لك باني كبرت واصبحت رجل

وهذا مفهوم اعوج لايتصل بالرجولة ابدا اذا انت من اهل المقاهي رجل او انك تدخن فانت رجل

لو انك حاولت ان تفهم هذه الفئة من الشباب بان التدخين له مضاره ومساوئه لاخذت لك منهم محاضرة تتعجب لمحتواها

وربما البعض يهينك ويضربك ضربا مبرحا لانك اعتديت على رجولته

وترى اكثرهم وقت المباريات في المقاهي شيشة او سيجارة وتشجيع غريب وكأنه يشاهد المبارة من اعلى المدرجات الى وقت متأخر من الليل

وشباب من نوع اخر تنحصر حياتهم واهتماماتهم بالسيارات فتراهم في اماكن خاصة يعدونها خصيصا اما للتنظيف او للتخميس وسباق السرعة

التنظيف اهون الامور والسرعة داء وجنون ولا هناك نقيض عند البعض البعض الاغاني بصوت عال ورقص وهيصة على قولتهم

وطرف اخر لا عزاء او اناشيد دينية اناشيد تصاحبها هيصة وفرح لا اشكال ولكن العزاء يصاحبه فرح وسرور وضحك هذا نقيض يحتاج الى وقفة وتفكير

نذهب شيئا فشيئا للموضة ونرى كيف يذهبون للحلاق وخذ شروط الحلاقة لاتقص لاتشيل سوى جذي ويطلع ليك في النهاية بقصة تقول ديج او استغفر الله خروف بس ما ادري اشلون يقنعون روحهم بهالتسريحات ويتقبلونها ويعتبرون حالهم كشخة لو اسوي تسريحاتهم ما اطلع من البيت لين يرجع شعري مثل ماكان

نعرج اللحين على الزواج عند الشباب ونشوف متطلباتهم وشروطهم

خذ هذا يبي وحده بيضا وشقراء وناضجة وممشوقة القامة وعيون خضراء او زرقاء او ما يتزوج ولو تشوفون حالته حتى نعجة ماتقبل فيه وياحلوها قصته ودقلته تطيح الغراب من السماء

شباب اليوم يعلمون من هو المطرب الفلاني من هو اللاعب الفلاني ولكن من هو الصحابي عمار بن ياسر من هو الامام الباقر (ع) ليس لديهم علم

خلونا نبحث عن الجوهر اللحين ونقول لو احد من هالشباب تزوج بفتاة من الفقرة السابقة اللي وصفناها سابقا شنو راح يكون الناتج شنو بيكون جيل المستقبل


لنا عودة ووقفة اخرى

اوقات طيبة نتمناها لكم

بالنسبه الى البنات

الصراحه ماساه

ساعات احنا بنات حالنا حالهم نستحي نطالعهم

وساعات استنكر ذلين شلابسين ..يلبسون ثياب

حتى قدام بنات مستحيل البسهم .. فشيله شلون هم يطلعون

فيهم الشارع ويمشون بثقه ....

ولا عاد يوم العيد الصالونات ما تنطب

الي تحف والي بدي كير ومني كير

والي استشوار قصاص شعر

وحاله وفوق كل هذا ..جوفها يوم العيد

ولا رايحة عرس في فندق

مو المكياج الدفش الافت

وين الحمرة الحمرة

وين الاوان الفلاش الي تلفت النظر

هم وراها نطلع الشارع ما نحس نفسنا في الشارع

كانه في عرس .. او مكان لعرض الازياء

يعني بشكل عام ماسااااه والله يعينا عليهم ...

هذه بنات اليوم بالاسواق تفتر ضايع عمرها بالمسج ويا المسنجر
وهذا كلام ادري انه يقهر لكن شسوي
هالزمن فيه خير وفيه شر


اما بالنسبه الى الشباب ...

سؤال دائما يجي في بالي لما اجوف اشكالهم

اقول دلين ما يطالعون روحهم في المنظرة ...

ادري انهم يطالعون روحهم ..بس شلون يجوفون شكلهم

يعني قصدي شلون يعجبهم شكلهم ..


ولا والي يقهر اكثر ..هو شكله جذي

ويدور له من بنات الاشكال الي فوق

ويكلمها ويقول لها ..انه كلمتج لانه حسيتج انج

حلوة وطيبه وخلوقه .. عجبتني اخلاقج ..وانتي الوحيدة من بين ربعج

الي عجبتيني ... وما قدرت ما اكلمج ....


والي يقهر اكثر ردها عليه ...

انه ما اكلم صبيان ... بس مادري شلي خلاني اكلمك

رجولتك شدتني لك حسيتك غير عن ربعك ....والخ من الحجي الفاضي

والقهر انه كل واحد مصدق عمره ...

وكل واحد يجذب على الثاني ..

هي تسوي نفسها تحبه وتموت عليه

وهو يحط في باله انه بنيه حبته وانه رجال بهالحركه

وهو يسوي نفسه يحبها ويموت عليها

وهي تستانس على عمرها انجاز خلته يحبها

....

ولو يتزوجون هالاشكال من بعض

شنو الجيل الي بيطلع ...

جيل فاسد ...

فاسق ..

دام قدوتهم خراب شنو هم بيطلعون ؟؟
........

مشكور اخوي السفير على الموضوع

موضوع حلو وفيه حماس ....

يالله ننتظر جديدك

تقبل مروري

بصراحه اني ما احب النوع من الشباب لاني احسه جيل طايش

ومو قد المسؤليه .. اما بالنسبه الى اذا اجتمع هذا النوع من ادم

مع ذاك النوع من حواء فاكيد راح يكون ولادهم ضايعين بلا شك .. ليش ؟؟

لانه اذا هو ما عرف يربي روحه وما عرف يقول حق روحه انه هاده غلط ومايصير ..

ولا حتى منع زوجته من انها تسوي هالاشياء ولا قال اليها غلط فشلون بيقول الى ولاده وشلون بيعودهم

على عادات الي لازم يتعودون عليها .. واصلا اذا كان الى هالابو والام وقت الى انهم يربون هالاولاد ويبارونهم

ما قطوهم على الشغاله ولا يدرون عنهم ولا شي بس حدهم يطلون عليهم جدي طله ..

هاي بيكون انتاجهم في الولاد وهاي بيكون سلوكمهم .. يعني راح يكونون نسخه من ابوهم واهمهم ..

يسلموو خوك وفي انتظار الطرح الباقي

اخواتي ،، صمت / حلم وردي / دمعة يتيمة / عاشقة غريب طوس

تحياتي لكن وقلمكن الذي طبع ببصمته نورا يلامس واقعنا الاعوج

اللحين طالعه موضة بالامس توني اشوفها تنتشر بالقرية الله على هالذوق بس

هي قديمة بس اللحين اشوف قاعدين يرجعونها

الراس محلوق من الطرفين والوسط بس مخلينه تقولون ديج مو رجال

الحمد لله على نعمة العقل












لنا عودة

احسها جنون

حاله حال الديك اللي صوبة

يعني شكلة يصير مقزز

الواحد حتى ما يطيق يطلع فيه

يصير مهرج

بس ما ادري شلون يتحملون شكلهم

.
.
.

مشكور اخي السفير على المتابعة

و الاهتمام بالموضوع

بانتظار موضوع جديد





تحياتي
حلم وردي‬❥